Articles
العاشق والمعشوق
العاشق والمعشوق
الحربة
محلا زهوة عاشق مع معشوقو في جنان زاهي فحلة بألوان الأزهار
وانواورو فايحة معطرة
ولغدير ماه مرقرق جاري
القسم الأول
حار العاشق السقيم أش يكون العشق واش تكون فخزاينو من لأسرار
وعلاش طلاسمو واعرة
مايفكها حكيم ناجم قاري
أش تكون فعالو مجرد سيفوساير يطعن ف الخلق يمين ويسار
والدي صابو ليس يبرا
يضحى مسقوم فليعتو يداري
أش تكون حقيقتو واش يكون ريح من هبت عليه يلوى ولونويصفار
ماتعود ورقتو زاهرة
والدمع فانجالو يسيل جاري
أش يكون افصالو يتقلب لعشيق فاجمارو ما تفيد فيه مشايخة ولاتحزار
ماتفيد حيلتوفماجرى
ويقول يا ترى تخمد ناري
القسم الثاني
والمعشوق يقول أنا بالعشق نصيب عزي وصولتي وغاية لافتخار
ونحرم من هواني النضرة
وبيه نعرف قيمة ديناري
يا ويح من هواني ما نجود لو بوصالي حتى يذوق من كاسي لمرار
ونعدف ليه الجرة
ويجيني دليل يدق فداري
نصعب عليه ما سهال ونطلع ماه فلعقبة ونزيد عليه شلة أضرار
ونوضع فطر يقو لعثرة
باش يرفع شأني ومقداري
ونشوف الدمعة على خدوودو والغبينة فدخالو تكويه بصهد النار
وحالتو بالسقام ظاهرة
هكذا فلغرام شرطي ومعياري
ويلارضيت لو بالوصال بعد أيام اصدود و لهجرة يلازم حد التو قار
ويذوق غرامي بالقطرة
نوافيه بالقياس ما يفوت عباري
القسم الثالث
وصف لعشيق حالتوالسقيمة وروا قصة غرامووليعتو وأعطانا لأخبار
روحو ملجفا مكدرة
فأسواق لهموم جايل ومساري
ولمعشوق تباهى بصولتو وقسا علعشيق باحكامو جاير بالتيه والتعفار
نفسو في لغرام مجبرة
ويقول أنا فلهوا مجبد أوتاري
والغرام يالسامعين صفة من روحو رهيفة تشدو و تميل مع تغارد لأطيار
وتبات بالشوق ساهرة
وتقول أمترا يشعشع نهاري
الغرام نسمة لطيفة تهب علقلوب ولأرواح مبشرة بالغيث وهطول لأمطار
بيه لجوارح تضحى مخضرة
وتلقح لأغصان فالبيدا وصحاري
الغرام مشروب صافي معتق من شرب منو شي يعود هايم في تخمار
كل رشفة منو مسكرة
مزاجوطيب و مسك وعود قماري
القسم الرابع
الغرام مثل الندى يسري فعروق الزهرة الدابلة تعود يانعة بعد الاصفرار
وتفوح بنسايم عاطرة
وتنادي لاطيار تعالو لجواري
الحب اسيدي كلمة تخرج من ظلمة الجوف والحشا تنورالمبسم و لبصار
تخلي فرحة غامرة
مافالغرام مشاطرة لاتساوم فيه خود وأعطي ماتحتاج ميزان ولا عبار
سواقو بالخير عامرة
البايع فيه يربح والشاري
الغرام شي قومان فزماني ركبو سروجو بغاية الربح وعادو فيه تجار
افعالهم بالخديعة مخبرة
لسون رطبة وقلب ناري
الغرام حلاوتو فالصفا مثل لحليب فبياضو ما تشوبوشايبة ولا تعكار
ولعشيق فعرف هل لهوى مايبوح بسيرة غرامووليعتو يكتم لأسرار
العشيق يكون بالعهد وافي مايقطع ياس فمحبوبو رغم الجفا صبار
كيف قيس وعنترة
مفنن فلهوى أديب عبقاري
ولمعشوق يكون دوقي بعد الدلال ولجفا يليان لايكون قلبو ملحجار
ماتكون خلاقو مكنشرة
خود أسامعي كلام فلهوا ناضموشاب أديب ساعدو لجليل بالتسخار
جباحي بالموهوب عامرة
وسرات ولاعتو فدخال صياري
ونقول اسمي احمد حامد ربنا لكريم والنسب حسني من دوحة سيد لبرار
تمعن فنظامي وقرا
مابقات سجيتي خافية و أشعاري
وسلامي لفحول النضام ولكل من بيه طرب وشدا سيادي لشيوخ لأحبار
ومرحبا باللمة الحاضرة
نطلب لكريم مايواخدني بأوزاري
Posté le 08/06/2008 | 35 consultations | 0 commentaires | Voir et commenter l'article
قصيدة زهرة الأوطان
قصيدة زهرة الأوطان
الحربة
يالسايل عن بلادي اسمع لجواب واصغا ليا هي بلاد لمغرب لحرة الغالية زهرة لأوطان
القسم الأول
أش نحكي فأوصافها ديك الدرة المحضية واش نقول عنها فشعاري ما نضن يكفيني ديوان
هي قصيدة ما نضمها شاعرماوضع قافية زاهية بطبوع وتواشي وحجاز وماية واصبهان هي من عمق التاريخ قصتها بالفخر مبدية سطورها منورة شارقة ومحفوضة ف الوجدان
هي أم لأولادها و بالمحنة كتجود سخية تجبرمكسورهم يتعافى وفحضنها يرتاح لعيان
بلادي بها نفخر واهباني كل ميزة و مزية فأحضانها يطيب لعيش ولهنا ارض السلم ولمان
القسم الثاني
سال لمغرب عنها فكل وقاتو يحس بكية والشوق لاهب جوارحو ماجبر عنها سلوان
مهما جال فبلاد لغرب ولأقطار الشرقية ينكوى بالشوق لهواها وجبالها ورمال الشطان
يتفكر قصور وقصبات وأسوار لمدن لبهية وأعياد ومواسم ونزاهات ولمة لحباب وجيران
وعمران مغربي ماصل فيه نفحة اندلسية شيدوه عل صح سواعد لجدود في غابر الزمان
وزخارف مرصعة ونقش يبهر صنعة مغربية وخصات وقبب وسقاقي مرونقة بزليج عالالوان
القسم الثالث
تأمل فجبال الأطلس لابسة حلة بيضا ثلجية منها نبعت عيون وسواقي تنهمر ونهور ويدان
تحيي لحقول والبساتن وسهول بها مسقية و تجود بخيرات ونعايم مختلفة فضل من ا لمنان
ونخل وكروم ودوالي وواحات خضرا جنوبية دافق ماها يجري فعيون وسواقي وكداك لغدران
هاديك هي بلادي معروفة الاسم والكنية جوهرة موصوفة بالبها والخير والعز المصان
بنت الإسلام فالأصل وبدينها لحنيف معنية منقوشة فقلوب أولادها جميع مازيغ وعربان
القسم الرابع
كل مدينة فربوعو زهرة مفتحة ليك وليا عابقة بنسيم لجدود لعاطر وفاتحة الأحضان
بلادي مثل زربية زاهية منسوجة ليك وليا جول فبساطها لوسيع وتأمل زينها لعذب الفتان
بلادي كنجمة فسما تلالي تنور عليك وعليا نورها ساطع فلأفاق يضوي لينا حلوك الديجان
هي الحضن الدافي يضمنا يلا قسات الدنيا بلسم لجراح ودوا للروح الصعب فيها يهوان
بلادي بين لأمم صوتها مسموع فمحافل دولية بحكمة ورجاحة العقل وصفاها ف الميزان
القسم الخامس
ناديتك ياولد بلادي تعالى ودير يديك فيديا نعملو بالجد والوفا عسى نكملوهاد لبنيان
انامهنا وأنت ملهيه شوية منك ومني شوية ياك بقطرة قطرة كتحمل وتفيض الويدان
اللي خدا فينا يعطي تستاهل بلادي تضحية لا تعطيها بالقفا وتقول أنا ثم بعدي الطوفان
لمغرب كبر منك ومني غالي فمراتب العليا ياك بالتحقيق الناس تموت وكتبقى الأوطان
نعطيوه كيف عطانا لو بلاعمار رايتو مفدية نحميو مجادو ونكونو فساحتوجنود و فرسان
القسم السادس
عز الخيول مرابطها قالو فالأمثال المروية وعز الشعوب ف أوطانها فيها يرتفع الشأن
وبلاد الناس مهما تحلا فالعين ما تحن عليا قالو المكسي بثوب الناس لابد يبقى عريان
نموت فبلادي مرفوع الرأس مأمن بالقسمية ونوصفها فشعاري مغروم فلالة زينة البلدان
معشوقتي كاملة البها وبعناية المولى محضية حكيت محاسنهافاوزاني ولكريم كان لي عوان
ممزوجة فالدم حروفها وفلسان مد كورة هي هي رسمي وحمايتي وعزي و كنزي ضي لعيان
أراوي يلانهما سألوك من تكوا بحبها كية قول حمليلي من فاس ساكنة فدواخلو ولكنان
نضم الاستاد احمد الحمليلي الحسني
Posté le 08/06/2008 | 41 consultations | 0 commentaires | Voir et commenter l'article
النميمة
النميمة - زجل -
اللازمة
ما يمل من اسراير الناس عيبو نمام مريض مابرا
ساكن فيه وسواس خناس يموت ويعرف جميع ماجرا
بلسانو يخلي لقلوب مكدرة
***********
مهما دوا كثير لكلام ونهش فاعراض لعباد
صفتو عند الناس نمام سرو لمعادية والتبعاد
تبقى نارو فحشاه واقدة
معمر سواقو بالقيل ولقال يضل بايع شاري فلغشام
مجرد لسانو سيف للقتال مايراعي حرمة ولاحرام
حتى دار من لسانو ماهي سالمة
اللازمة
ما يمل من اسراير الناس عيبو نمام مريض مابرا
ساكن فيه وسواس خناس يموت ويعرف جميع ماجر
بلسانو يخلي لقلوب مكدرة
************
واخد حقو من صفة ايبليس منزوعة منو قيمة الانسان
مالو فلحياة صاحب ولا جليس جوفوبالشر يغلي تقول بركان
ولسانو لهيب كاوي مايرحنا
ماتوالمو حالة الموالمة زارع الشوك بدال الزهر
مايخلي لمة زينة سالمة لو وجد يفرق حتى الصخر
رديلتو في ادخالو مجدرة
اللازمة
ما يمل من اسراير الناس عيبو نمام مريض مابرا
ساكن فيه وسواس خناس يموت ويعرف جميع ماجر
بلسانو يخلي لقلوب مكدرة
*************
النميمة تفرق الخو على خوه وتشتت ارسام كانت عامرة
النمام يسعى لغايتو بسبع وجوه لابس ثوب اصلاح ونيتو غادرة
مشغول بالغير وروحو مودرة
النميمة تجري فلكره ولعداوة وسودت قلوب لاهل ولعشران
النمام بفعلو مع يبليس يتساوا كمن ارحام قطع وضحاو عديان
اللازمة
قيل راسك منها ياصاح ولعن وسواسك تتهنى
انسى عليك لغير ترتاح بعد لاتحشر نفسك بينا
راه النمام مدموم فشرع ربنا
يامن زارو نمام لا تصغالو حديثو سم يسري فلوصال
نهيه عسى يثوب من فعالو ا وقفل عنو بابك بالاقفال
رد بالك حبالو على عنقك معولة
اللازمة
ما يمل من اسراير الناس عيبو نمام مريض مابرا
ساكن فيه وسواس خناس يموت ويعرف جميع ماجر
بلسانو يخلي لقلوب مكدرة
لأخي وصديقي الفنان المبدع سعيد المفتاحي
تمت بحمد الله في تازة يوم خامس محرم الحرام 1429 موافق 15 /01/2008
Posté le 08/06/2008 | 39 consultations | 0 commentaires | Voir et commenter l'article
الشاعر احمد الحمليلي
قصيدة - صحوة
يا المولى عمني جودك واحسانك رواني خمدت نار كدات فصيار دخالي ولعضام
كيف يخيب من قصد يرجاك يا نعم الغني كمل ديني بمن هويت و حلا لي لمقام
القسم الأول
أنا التايه بين تكداري وليعتي ومحاني عمتني رحمة الكريم سيدي وتفاجى الغيام
كروب حلت بيا وغدرمن ناس زماني ضري تكشف بقدرتو وبرات لي لسقام
أنا التايه وباش راد الوعد حكم و رماني لكن لطف الله فجا همي وتنقشع الظلام
بعد كنت تابع هوايا وهوى ملا يهواني صحيت من أوهامي وعملت لنفسي لجام
ضاع الصغر ف الطيش واللهو سلاني ياويحي اللهوعمروكان غاية ولاكان مرام
القسم الثاني
ماخجلت من جهلي وسوء قول لساني ما رمت حكمة ف حياتي وما شديت لجام
ما عاشرت صلاح ما كان جمعي رباني طفيت النور الساطع وجلست هايم ف لعتام
رافقت شر الخلق ورضيت ملا يرضاني ضنيتو ليا سندة وجعلتو دخيرتي وحزام
من بعت معاه ف الربح والرأسمال كلاني ومن حسبتو شريف لقيتو مالو نسبة لقوام
صحبة من والا هدمت على راسي بنياني وكداك خلطة لردال كادت تجيب لي التمام
القسم الثالث
ما تعلمت كياسة من لبيب ولاوعيت معاني ماتسلحت برزانة وماجعلت لحكمة حسام
لمت زماني لوكان ينطق لوكان هجاني نسبت ليه عيوبي وزلات النفس ولقدام
طاوعت نفسي فهواها بشهوات زماني ماردعتها ولا فكرت ف النفس يومن تنضام
غفلت عن صلاتي وسر النوافل ماغواني لاربح دركت ولا بحسنات فزت بصيام
حطام الدنيا غرني ف الذكر ولوراد نساني يحق لي نذرف الدمعات ونزيد ف التدمام
القسم الرابع
فسجن زلاتي محبوس والذنب هو سجاني طلق سراحي ياربي نفسي والهوى ضلام
من سقطت قدامو ف لزلال لا بد ليه يعاني ومن خالف نفسو وخذلها يعلى ليه لمقام
رجايا فرحمتك يا من خلقني ولاهو ينساني غفر قولي وسوء فعلي وجميع الذنوب ولآثام
دخيلك بما جا ف لكتاب وبالسبع لمثاني ثبتني علصراط لقويم لايتنكس لي لعلام
بجاه طه سيد لخلق كافة الحبيب لعدناني جعلي التقوى وشاح والإيمان وسام
نسجت حلة وطرزتها بلفاض ومعاني للبيب لفاهم أهديت شغل حاذق فنضام
هي قصة كل من قلبو ف الردايل هاني يا خوفي عليه يعود بعد طيبو علقام
أراوي يلانهما سألوك عن لاسم وعنواني قول حمليلي من فاس وفتازة تم لرسام
واسمي احمد حامد الله الكريم المناني يرجى عفوه ما يحرمو يزور لمقام
وصلاة معطرة بطيب المسك والسوساني على سيد ما خلق ربي من عرب وعجام
وسلامي نهيبو لشياخي هما زهور جناني العارفين بأسرار السجية ولغز الكلام
الشاعر احمد الحمليلي
Posté le 08/06/2008 | 66 consultations | 0 commentaires | Voir et commenter l'article
سرابة - العود
سرابة العود
الشاعر احمد الحمليلي
شوشني عودي يبات يرتي * بصهيلو ونواحو * ملي خيل السربة راحو
فالمربط ساكنو ما رتاح
لوكان ينطق يشكي بعلاتو * وبهمو وتجياحو * ويرجى طليق سراحو
يفرد ويسابق لرياح
ملي نضرت سرجو ولجامو * وزينتو وسلاحو * زاد عن قلبي جراحو
ودمع انجالي ساح
اش يداوي علتو تزهى بعد لكبوة ايامو وتعود حوافرو صحاح
يلحق بالسربة عودي ويسطب لمواسم والافراح
يلعب ويجيني بالسلامة غانم هداك غاية سعدي ولرباح
مالي حيانا اناي وعلى ربي ايلي لاباس علينا ايلي
عودي الادهم كينوح
امضرا تزول جراحو * ويتعافى من تكلاحو * يهنى خاطري ويرتاح
وتفارق العلة كوايمو * ماتكبحشي جماحو * ويشرق ثاني صباحو
وسط السربة حياح
وتعود الصولة ليامو * والزمان يخطاه برماحو * كاع همومي يتلاحو
وانا فاوصافو مداح
عداعدا مضرا للنزاهات تلوح لبشارة و بها ينادي لبراح
اسيدي ويكون سرجو صقلي ولجامو فضة مع السلاح
مالي حيانا ايلي وعلى ربي ايلي وتزيان اللمة مع احبابي ف الادواح
احمد الحمليلي
Posté le 08/06/2008 | 49 consultations | 0 commentaires | Voir et commenter l'article
